Të hënat e Nëntorit, muajit të festave kombëtare, muzeu “Marubi” i ka shoqëruar me fotografi që përcjellin këta momente të rëndësishme për historinë e Shqipërisë.
Më 28 Nëntor 1913, në Shkodrën e administruar nga një Komision Ndërkombëtar, kryetari i Bashkisë së qytetit Muharrem Gjylbegu, organizon një ceremoni në përkujtim të përvjetorit të parë të Pavarësisë. Në ballkonin e institucionit që drejtonte, u ngrit edhe flamuri kombëtar i qendisur nga Bernardina Marubi, e bija e fotografit Kel Marubi.
Të pranishëm në ceremoni ishin përfaqësuesit e pesë Fuqive të Mëdha: Britania e Madhe, Ausrtro-Hungaria, Italia, Franca dhe Gjermania. Fjalën e hapjes e mbajtën Gjenerali Filips, guvernator i qytetit dhe kryetari i bashkisë Gjylbegu.
Siç mund ta dalloni edhe nga ky imazh i Kel Marubit, atmosfera i përngjan një feste me simbole kombëtare. Ceremonia u shoqërua me këngë e thirrje patriotike për bashkim të Shkodrës me shtetin e ri shqiptar të themeluar një vit më parë.